Зустріч Миколая
Тко везеся на санках,
З подарунками в руках?
Довга біла борода –
Миколай иде сюда!
Дзвоник чути здалекá,
Бо дорога не близькá,
Файну співанку співай –
Скоро прийде Миколай!
Миколая в довгу путь
Білі коники везуть,
Через студінь і зиму –
Поклонімся мы йому!
Дзвоник чути здалекá,
Бо дорога не близька,
Файну співанку співай –
Зараз прийде Миколай!
Миколай уже прийшов,
Сніг, мороз переборов,
Мы усі до єдного
Раді видіти його!
Нині в нас святковий день –
Миколай у двері йде,
Файну співанку співай –
Вже є з нами Миколай!
Дзвонять, дзвонять дзвоники,
Біжать білі коники!
Чудеса
Заженіт нам Ангелика
У сись празник небеса!
Най дітина невелика
Чує вість про чудеса
Уд угодника сятого –
Ун їх робит щедро й много!
Най то знают діти всі
З Пудкарпатської Русі!
Святий Миколай
Миколай велику ношу
Скоро дітьом принесе!
Няньку, мамко, я вас прошу –
Розкажіт про ми про сесе.
Бо приснило ся вночи
Як співали, летячи,
Ангели з самого рая
Про сятого Миколая!
Бабка з дідиком казали,
Што самі колись давно
Чисті чоботики клали
Увичирі на окно.
Коли спати вже лягли,
То як знали, як могли
Подарунки си просили,
Миколаю ся молили.
Діточок на світі много,
Миколай учує всіх,
Є в угодника сятого
Для дітий великий міх,
Там дарунки всім на диво,
Оби жили-сьте щасливо,
Ты, мала дїтинко, знай –
Тебе любит Миколай!
Миколай прийшов!
Чути в горах звук трембіти,
Гуслі тай цимбали –
Миколая малі діти
Вже ся дочекали!
Миколай, Миколай!
Подарункы роздавай –
И солодкого, й смачного
З свого міха чаровного!
Діти мамці помагали,
Файно ся учили,
Старых людий честовали –
Дары заслужили!
Миколай, Миколай!
Подарункы роздавай –
З свого міха чаровного
Чесним дітям дарів много!
Сніг такий, што уйти з дому
Старшина не радит,
Но угоднику сятому
Тото не повадит!
Миколай, Миколай!
Нам ушитким помагай!
Обы в радості уднині
Жили всі на Верховині!
Миколайові дары
Тиха нуч. Заспали діти.
Сплят и мати, и отиць,
А изгорі місяць світит
И на хыжу, й на двориць.
Через поле, через яркы
Миколай сятий иде,
Чесным дітьом ун подаркы
У топаночкы кладе:
Чоколадку авадь цукрик,
Вадь солдата на коні,
А нечесным дітьом – прутик;
Годно быти, што й міні.
Світит, світит місяць з неба,
Ходит, ходит Миколай…
Чоколады ми не треба,
Айбо й прутик не давай!
Михайло ЧУХРАН
