Истинні севлюшчани

Истинний уродженець Севлюша, котрий виріс на топтаних крумплях, домашньому вині та вітрах із Чорної гори, має в собі генетично закладені рисы характера, котрі вмотивовуют його вчинкы и поведінку уздовж ушиткого житя. По-варошськи кажучи, такий його менталітет. Упознайте и вы себе!
1. Истинний севлюшчанин (дале – ИС) годен упити за вичур 5 літрув свого вина, но не уп’є и літра воды. Бо не корова.
2. ИС фурт носит зарядний пристрій до мобілки при собі та заряджат її на роботі. Або в гостях. Шповрує дома електрику.
3. ИС нігда не вважає крадіжку біціглія протиправним вчинком. «У мене взяли і я взяв».
4. Вертаючися из хащі, наповнює кошарку травов та листям, а згорі накладує грибы, обы всі думали, што несе повно-преповно біляків.
5. ИС, приманюючи рыбу, умітує за пув-года в Тису тулько токану, што годен бы бов укохати свиню на пудруга мажі, а удгодовує тов рыбов єдного мацура.
6. ИС несе на вадаску пувлітер палинкы, печену жирну курицю, хліб, ковбаску, породичкы, а приносит худющого фазана (варіант – сідого уд старости зайця) из пудозрілым запахом. Вышеупомянутый мацур уд того м’яса утіче гет.
7. ИС має сохташ немногословный, но кидь мало упивший (позерай пункт 1), то годен до рана приказовати хоть про што (позерай пункты 2, 3, 4, 5, 6,) из пам’ятником виноробу у центрі Севлюша.
8. Дякуючи пункту 1, ИС май скоро утрафит у Євросоюз, чим в унітаз.
9. ИС, вертаючися из заробітків, пропиває вадь програє по путі вшиткі гроші, а пак дома розказує, як «паны обманули», авадь «бригадир пропав з грошима». Май продвинутий каже, ож напоровся на рекет, завто домашні радуются, што хоть живий ся убстав.
10. ИС так дуже красно выхованый, што сважаться лиш на «вы»: «Будьте добрі, ідіт на…», «Перебачте, вы свиня», «Мені ся видит, ож вам місто у…»
11. Идучи по улици пішо, ИС лає всім автомобілістам – «Не гадали бы задавити челядника», а коли сам за кермом, то лає всім пішоходам – «Гутта бы їх побила, скачут пуд колеса, хочут ми біды найти…»
12. ИС ніколи не гасит на газовуй плиті єдну конфорку, обы зекономити на швабликах.
13. Истинна севлюська жона (дале – ИСЖ) радо зустрічає свого ИС із піврочных заробуткув, а на ранок ушиткоє робочоє цуря помыто, просушено и складено в ташку, котра вже стоит пуд порогом.
14. ИСЖ идучи в неділю з церкви, слабо тямит, што казав пуп у казанні, айбо добре тямит, які нові топанкы мала сваха Юлина і як нефайно зачесалася кума Монція.
15. Заправляючи мотор, ИСЖ супукуйно дає стечи бензинови у бак, граціозно унимат заправочний пістолет и акуратно вішат’го на місто; натомість ИС енергійно стрясує пістолет до пуслідньої цяпкы бензину. Такий чоловічий сохташ, йсе вродженоє.
16. ИСЖ часто хворіє, но умирає ж усе чогось чоловік. Діагноз, встановлений цімборашками його безутішної вдовиці, фурт єден: – Умер, бо пив!
17. Коли подеколи и жона, як кажут, спочине, діагноз цімборашок тоже постійно єден : – Умерла, бо гриз ’ї… Ніби могла би ще жити, а жити, неборанька! (хоча пані мала такий вік, што закончила вошколу при Томаші Масарику і в перший раз уддалася при Мікловші Горті).
18. ИС цілу зиму в пивници перебират тонну яблок из свого керта, убират и їст лиш погнилі, бо здорові ще постоят. Таким чином ніколи здоровых не їст!
19. ИС не вірит уряду, депутатам, президенту, пресі, завто нараз и глубоко вірит хоть-чому, учутому на малому базарі із бесіды зовсім постороннїх людей. Майвышший критерій истины – «Старі жоны казали». То вже не змиє и сята вода.
20. Головна вароська валюта при розрахунку за зроблену послугу – «Раз дякую», із натяком на будущу матеріальну плату, якої насправді не буде.
21. «До кавы» – специфічний вароський напій, з якого начинатся, на жаль, алкоголізм не єдного ИС. Заява у барі «Дайте нам каву і до кавы» свідчит, што клієнт уже став на ховзкий путь.
22. ИСЖ нізашто не хоче вакциноватися уд коронавіруса, завто при любуй хворобі купує в патіці без рецепта повні жмені всяких гомбичок неясного походженя, бо «так дохтор Комаровський у телевізорі казав».
23. На базарі слово «мадярський» є признаком майвисокої якості любого продукту. «Беріт, пане, мандарини, такі добрі, мадярські». По-базарному, мандарини ростут не в Грузії, а нараз за Вілоком!
Робота над сим переліком севлюських чеснот продовжится и скоро буде опублікована із усіма правками и доповненнями!